Бројот на загинати во силниот земјотрес со магнитуда од 6,8 степени што ја погоди југозападна Јапонија порасна на 30 лица. Спасувачите пребаруваат низ урнатините на трговски центар, фабрика за хартија и срушени домови во префектурата Кумамото, додека високите температури и новиот афтершок ја компликуваат потрагата по преживеани.
Околу 170 спасувачи пребаруваат во трговскиот центар „Аон“ во градот Кашима, каде што за време на потресот се наоѓале илјадници луѓе. Иако околу 3.000 посетители биле навремено евакуирани на паркингот, подоцна избувнала експлозија на гас во друг дел од објектот.
Од 12 лица извлечени од урнатините во овој објект, шестмина починале. Сите зафатени од експлозијата биле вработени во продавниците кои се вратиле внатре по првичната евакуација. Претседателот на компанијата упати јавно извинување поради тоа што не била предвидена можноста за гасна експлозија.
Полицијата и воените сили продолжуваат со потрагата и во фабриката за хартија „Нипон Пејпер“ во Јацуширо, каде што се урна тавниот оџак. Од десетмина заглавени работници, осуммина го загубија животот. Меѓу жртвите е евидентиран и еден виетнамски технички приправник, кој загинал при пад на кран во фабриката каде што работеше.
Во земјотресот се повредени најмалку 62 лица, а речиси 5.000 припадници на армијата се мобилизирани на терен на температури кои достигнуваат до 35 степени. Aфтершокот со магнитуда од 5,8 дополнително го зголеми ризикот од нови уривања.
Повеќе од 23.000 домови останаа без електрична енергија, а околу 75.000 немаат пристап до вода за пиење. Речиси 15.000 граѓани се сместени во 400 привремени засолништа, каде што воените екипи доставуваат ладилници, храна и вода.
Земјотресот предизвика и привремен прекин на производството во фабриките на автомобилските гиганти Тојота и Хонда, како и во повеќе компании од секторот за полупроводници. Регионот Кјушу учествува со околу 20 проценти во индустриското производство на Јапонија, но аналитичарите укажуваат дека прекините се превентивна мерка, а не последица на директни оштетувања на погоните.
