Најновата епидемија на ебола во Демократска Република Конго значително се шири и излегува од контрола, соопштија владините власти откако бројот на починати официјално достигна 600 лица. Вкупниот број на потврдени случаи во земјата веќе се искачи на 1.759, а дополнителна паника предизвика појавата на нови сомнителни случаи во претходно незасегнати провинции. Официјалните извештаи потврдија дека вирусот за првпат е детектиран во градот Кисангани во провинцијата Тшопо, при што едниот случај е поврзан со првичното жариште, додека вториот пациент нема никаква географска поврзаност со досега познатите епидемии.

Претставничката на Светската здравствена организација (СЗО) во Конго, Ан Ансија, предупреди дека вирусот се шири со голема брзина поради постојаното движење на населението и безбедносната нестабилност во регионот, поради што капацитетите на центрите за лекување се речиси целосно пополнети. Ситуацијата дополнително е отежната од фактот што оваа епидемија е предизвикана од реткиот вирус Бундибуџо (Bundibugyo), за кој во моментов не постои одобрена вакцина ниту специфичен медицински третман. Научниците неодамна започнаа клинички испитувања со надеж дека брзо ќе пронајдат соодветен лек.

Додека здравствената криза го достигнува својот пик, одговорот на теренот е сериозно загрозен бидејќи медицинските лица масовно ја напуштаат работата. Здравствените работници во провинцијата Итури рекоа дека воопшто немаат земено плата откако е прогласена епидемијата, што ги изложува нивните семејства на тешки социјално-економски услови. Покрај доцнењето на финансиите, тие реагираат и на недостигот од заштитна опрема, неправедниот третман од властите, како и на секојдневните напади од револтирани локални жители кои сè уште покажуваат скептицизам кон постоењето на вирусот. Властите ги правдаат доцнењата со блокадата на локалниот аеродром што го оневозможува протокот на парични средства, но ветуваат дека проблемите на лекарите итно ќе бидат решени.