Високите температури и топлотните бранови претставуваат сериозен ризик за здравјето, бидејќи можат да предизвикаат дехидрација, топлотна исцрпеност, топлотен удар и влошување на хроничните заболувања. Поради климатските промени, ваквите периоди стануваат сè почести и подолготрајни, па здравствените власти апелираат граѓаните навреме да преземат мерки за заштита.
Најзагрозени се постарите лица, бебињата и малите деца, бремените жени, лицата со хронични заболувања, лицата со намалена подвижност, како и сите што работат или подолго време престојуваат на отворено.
За време на најтоплиот дел од денот, помеѓу 10 и 17 часот, се препорачува да се избегнува престој на директно сонце. Доколку е неопходно да бидете надвор, останувајте во сенка, правете почести паузи и избегнувајте интензивна физичка активност.
Редовната хидратација е една од најважните мерки. Водата треба да се пие во текот на целиот ден, дури и кога не чувствувате жед. Треба да се избегнуваат алкохолни, енергетски и засладени пијалаци, како и прекумерен внес на кофеин, бидејќи можат дополнително да придонесат за дехидрација.
Домот треба да се одржува што е можно посвеж со проветрување во раните утрински и вечерни часови, спуштање ролетни или завеси и користење вентилатори или клима-уреди, без големи температурни разлики меѓу внатрешниот и надворешниот простор. Доколку немате можност за разладен дом, дел од денот поминете во климатизирани јавни простории.
Се препорачува носење лесна и светла облека од природни материјали, капа или шешир и очила за сонце со УВ-заштита. При престој на отворено задолжително користете крем со заштитен фактор, а исхраната нека биде полесна, со повеќе свежо овошје и зеленчук. Воедно, храната треба правилно да се чува бидејќи високите температури го зголемуваат ризикот од расипување.
Посебна грижа треба да им се посвети на децата, постарите лица и хронично болните. Никогаш не оставајте деца, постари лица, лица со попреченост или домашни миленици во паркирано возило, дури ни накратко, бидејќи температурата во автомобилот може за неколку минути да стане опасна по живот.
Работодавците треба да ја приспособат организацијата на работата во услови на горештини, така што физички најтешките задачи ќе се извршуваат во посвежиот дел од денот, со редовни паузи и обезбедена вода за пиење.
Доколку се појават симптоми како силна жед, слабост, вртоглавица, главоболка, мачнина, грчеви, забрзан пулс, висока телесна температура или нарушена свест, лицето треба веднаш да се премести на ладно место и да се започне со разладување. Ако постои сомнеж за топлотен удар или лицето е без свест, неопходно е веднаш да се повика Итна медицинска помош.
Здравствените институции препорачуваат граѓаните редовно да ги следат метеоролошките и здравствените предупредувања и да ги приспособат секојдневните активности на временските услови за да го намалат ризикот од здравствени последици предизвикани од екстремните горештини.
