Владата синоќа го усвои вториот ребаланс на Буџетот за 2026 година, со кој се прават измени во проекциите за приходите и расходите, а следен чекор е предлогот да биде разгледан и усвоен во Собранието. Министерката за финансии Гордана Димитриеска-Кочоска денеска треба да одржи прес-конференција на која се очекува да ги образложи предложените измени и нивните финансиски ефекти.

Според информациите од владината прес-служба, ребалансот е потребен поради фискалното влијание на мерките за поддршка на граѓаните и бизнисот, меѓу кои се намалувањето на акцизата и на данокот на додадена вредност (ДДВ) кај горивата. Овие мерки влијаат врз буџетските приходи, поради што се врши приспособување на приходната и расходната страна на државната каса.

Со предложените измени, вкупните буџетски приходи се проектираат на 374,2 милијарди денари, додека расходите се планирани на 420,5 милијарди денари. Од Владата наведуваат дека буџетскиот дефицит останува на непроменето ниво, иако се прават корекции во буџетските проекции.

Целта на ребалансот, според владината прес-служба, е да се зачува стабилноста на јавните финансии и да се обезбеди редовно функционирање на институциите. Владата посочува дека измените треба да овозможат реализација на планираните програми и навремено исполнување на финансиските обврски.

Ова е вториот ребаланс на Буџетот во 2026 година. Предлогот сега треба да помине низ собраниска процедура, каде што пратениците ќе треба да одлучат дали ќе ги поддржат предложените измени.