Американскиот претседател Доналд Трамп планира да му ја додели Националната медалја за наука на Илон Маск, извршниот директор на „СпејсЕкс“, објавија американски медиуми. Националната медалја за наука се смета за највисокото американско признание за научници и инженери, а според најавите, меѓу годинашните добитници ќе бидат и некои од највлијателните имиња во глобалната технолошка индустрија.

Според информациите што ги пренесе „Фокс њуз“, признанието ќе го добијат и коосновачот на „Гугл“, Сергеј Брин, извршниот директор на „Енвидија“, Џенсен Хуанг, како и извршната директорка на „Еј-Ем-Ди“, Лиза Су. Националната медалја за технологија и иновации, пак, би требало да им биде доделена на извршниот директор на „Дел Технолоџис“, Мајкл Дел, и на извршниот директор на „Мајкрософт“, Сатја Надела. Тоа е највисокото американско признание за технолошки достигнувања.

Најавата за признанието за Маск доаѓа во период кога тој повторно е во центарот на американската дебата за развојот на вештачката интелигенција. Маск во понеделникот соопшти дека единицата на неговата компанија која се занимава со вештачка интелигенција ќе биде преименувана во „СпејсЕксСИ“.

Преименувањето доаѓа откако Трамп неодамна повика терминот „вештачка интелигенција“ да биде заменет со „суперинтелигенција“. Американскиот претседател за време на обраќањето пред Генералното собрание на Обединетите нации изјави дека САД, а според неговите зборови и целиот свет, треба да почнат да го користат терминот „суперинтелигенција“, кој според него е попрецизен.

„Од овој момент, сите документи на Соединетите Американски Држави, а се надевам и на целиот свет, ќе бидат променети така што ќе го користат многу попрецизниот израз ’супер’, наместо ’вештачки’. Значи, суперинтелигенција“, изјави Трамп.

Маск и Трамп во минатото имаа турбулентни односи, но нивната соработка повторно го привлече вниманието по враќањето на Трамп во Белата куќа. Потенцијалното доделување на Националната медалја за наука на Маск би било едно од најзначајните официјални признанија за неговата работа во областа на технологијата, инженерството и вселенската индустрија.