Главниот град денеска забележа максимални 30,1 степени, додека во поголем дел од земјата преовладуваше вистинско доцно лето. Сепак, мирната и топла атмосфера има краток рок. Според Управата за хидрометеоролошки работи, претежно стабилното време ќе се задржи само до сабота, по што од недела следува изразен пресврт со поројни дождови, грмежи, засилен ветер и постепен пад на температурите од почетокот на идната недела.

Официјалните мерни станици попладнево регистрираа значително затоплување. На мерното место Скопје-Петровец живата во термометарот се искачи на максимални 30,1 степени, додека на Зајчев Рид беа измерени 29,9 степени. Во Демир Капија, Велес и Гевгелија максималната дневна температура достигна 29,3 степени, а во Кавадарци 28,7 степени.

На планинските станици остана значително посвежо, па Крушево регистрираше максимум од 19,5 степени, додека на Попова Шапка највисоката дневна вредност изнесуваше 14,5 степени.

Четврток и петок носат продолжување на сончевото време со мала до умерена локална облачност. Утре во Скопје ќе преовладува сончево со мала облачност и слаб ветер од променлив правец, додека на ниво на државата ќе дува слаб до умерен југоисточен ветер.

Во петок минималните утрински температури ќе се движат од 8 до 16 степени, а дневниот максимум ќе се искачи во интервалот меѓу 26 и 32 степени. Слично време ќе се задржи и во сабота, со утрински вредности од 9 до 17 степени и максимални 33 степени, иако во планинските предели се очекуваат услови за слаб локален дожд.

Промената на синоптичката слика започнува во недела попладне. Иако максималната температура сè уште ќе достигнува од 25 до 32 степени, атмосферата ќе стане нестабилна. Се очекуваат повремени локални врнежи од дожд, грмежи и засилен ветер, а наместа процесите ќе имаат форма на краткотрајно невреме.

Метеоролозите најавуваат локално пообилни врнежи во текот на понеделник. Веќе од вторник, под влијание на продор на значително постудена воздушна маса од север, ќе настапи поосетно опаѓање на дневните температури низ целата земја.