Ново истражување сугерира дека силденафилот може да го забави ширењето на одредени видови рак, но научниците предупредуваат дека се потребни клинички испитувања пред евентуална примена кај пациенти.

Израелски научници објавија истражување кое покажува дека силденафилот, активната состојка на лекот Вијагра, би можел да го забави или спречи ширењето на одредени видови рак преку нарушување на снабдувањето на клетките со холестерол, процес што е важен за создавање метастази.

Студијата, објавена во списанието Cancer Research, ја спровеле истражувачи од Институтот „Вајцман“ во соработка со американскиот Национален институт за рак и израелскиот здравствен систем „Клалит“. Истражувањето се темели на експерименти со глувци, човечки туморски клетки и анализа на податоци од околу пет милиони пациенти собрани во период од 20 години.

Научниците утврдиле дека силденафилот го попречува транспортот на холестерол во клетките на ракот, со што им го отежнува создавањето метастази. Кога бил комбиниран со статини – лекови за намалување на холестеролот – ефектот бил уште поизразен, бидејќи клетките не можеле да произведуваат нов холестерол.

Најдобри резултати биле забележани кај пациенти кои користеле и силденафил и статини најмалку шест месеци пред поставувањето на дијагнозата. Истражувањето опфатило рак на дојка, меланом и рак на белите дробови, а слични резултати биле забележани и кај рак на дебелото црево и простата.

Истражувачите нагласуваат дека овие резултати се охрабрувачки, но дека се потребни дополнителни клинички испитувања за да се потврди ефикасноста и безбедноста на ваквиот пристап во лекувањето на ракот.