Организаторот, Grève féministe (Феминистички штрајк), процени дека 250.000 луѓе излегле на улиците низ Франција на околу 150 демонстрации, а само во Париз 120.000 луѓе.
Некои демонстранти го напаѓаа американскиот претседател Доналд Трамп, вклучително и жени од активистичката група Фемен. Тие маршираа топлес со американското или руското национално знаме, означено со свастика, насликано на нивните гради.
Активистките на Фемен го осудуваа „подемот на фашизмот во Европа и во светот“ на маршот за Меѓународниот ден на жената во Париз. Цел на протестот беа повеќе истакнати личности во денешниот политички пејзаж, особено американскиот претседател Доналд Трамп, рускиот претседател Владимир Путин и премиерката на Италија Џорџа Мелони.
„Ова е битка, не е готово“, рече 49-годишната Сабине, која маршираше со својот седумгодишен син.
„Одиме во вистинската насока: Трамп, маскулинистите, тие прават многу врева, но не се толку силни како нас“, рече таа за АФП.
Вечерта Ајфеловата кула беше осветлена со порака за солидарност со авганистанските жени, чии слободи се скратени откако Талибанците се вратија на власт. Пораката: „СОС Авганистанки“ беше прикажана на француски, англиски, фарси и арапски.
Поплаките за платите останаа на врвот на агендата за многу од учесниците на маршот. Просечната женска плата во Франција е околу 14 отсто помала од машката плата за истото одработено време, според националниот институт за статистика Insee.
