Градските власти во Скопје најавија серија мерки за спречување на повторно нелегално депонирање отпад на поранешната депонија Вардариште, откако повторно биле забележани камиони што носат ѓубре на локацијата.
Како една од главните мерки, приодите до депонијата ќе бидат физички блокирани со ископување ровови, со цел целосно да се оневозможи пристапот на возила. Дополнително, во близина на ЈП Лајка ќе биде поставена заштитна ограда, што претставува уште една бариера за влез во просторот.
Овие активности следуваат по последното палење на депонијата на 15 април, што повторно го отвори прашањето за загадувањето и ризиците по здравјето на граѓаните.
По први мај, најавено е и засилено присуство на инспекциски служби на терен, кои ќе дежураат 24 часа дневно. Планирано е тие да патролираат континуирано, а на локацијата ќе бидат поставени и дополнителни камери за следење на состојбата и спречување нови инциденти.
Од граѓанската иницијатива „Стоп за Вардариште“ информираат дека градските власти започнале и подготовки за т.н. „одгасување“ на депонијата – процес кој има за цел контрола и намалување на гасовите што се создаваат во неа. Овој процес се очекува да започне најдоцна до август, со можност да стартува и порано.
Во рамки на подготовките, веќе се ископани два бунари од кои се земени примероци за анализа. Мострите се испратени во акредитирана лабораторија на Универзитет „Гоце Делчев“, а резултатите треба да бидат јавно објавени.
Според најавите, во следната фаза ќе се изградат вкупно 22 бунари со прецизно утврдени координати, со цел да се измери количеството гас што се ослободува од депонијата. Ова ќе претставува истражувачка основа за понатамошни чекори.
Доколку анализите покажат доволно присуство на гас, можно е да се постави и специјална централа за негово искористување, што би претставувало дополнителен еколошки и енергетски бенефит.
Во меѓувреме, најавено е и хумано преселување и згрижување на ранливото население кое живее во близина на депонијата, како дел од пошироките мерки за подобрување на условите во ова подрачје.
Од „Стоп за Вардариште“ посочуваат дека повторно е ставен во функција телефонскиот број за пријавување (072 898 898), кој претходно не бил активен, што треба да им овозможи на граѓаните побрзо да реагираат во случај на нови прекршувања.
Иницијативата нагласува дека се неопходни континуирани превентивни мерки, а не само реакција по инциденти. Тие предупредуваат дека не ја исклучуваат можноста за нови граѓански блокади доколку продолжи палењето на депонијата.
„Загадувањето од Вардариште не смее повторно да стане наше секојдневие“, порачуваат од иницијативата, нагласувајќи дека ќе продолжат внимателно да ја следат ситуацијата.
