Унгарскиот премиер Питер Маѓар предизвика внимание во јавноста откако објави снимки од приватниот одмор во Турција, на кои се гледа како ужива со своите синови на брегот на Анталија, вози џет-ски и се забавува со семејството. Маѓар во Турција пристигна поради самитот на НАТО, негов прв голем меѓународен настан откако во мај ја презеде премиерската функција по падот на долгогодишната влада на Виктор Орбан.
По завршувањето на официјалниот дел од посетата, наместо веднаш да се врати во Унгарија, премиерот останал уште неколку дена на турското крајбрежје со своите два сина.
Снимките од одморот предизвикаа реакции
Маѓар на социјалните мрежи објави видео од престојот во Анталија. На снимките се гледа како вози џет-ски, се спушта по водени тобогани со децата и шета покрај плажа. Објавата предизвика реакции кај дел од унгарската јавност, а критиките главно се однесуваа на тоа дали приватниот одмор бил поврзан со службеното патување.
Како одговор, премиерот порача дека станува збор за приватно патување и дека сите трошоци ги покрил самиот.
„Мало посебно издание за пропагандистите. Поминав продолжен викенд во Турција со моите деца, а сите трошоци ги платив сам“, напиша Маѓар.
Не користел државни средства
Унгарскиот премиер претходно најавил дека по самитот на НАТО ќе помине четири дена со своите деца на турското крајбрежје и дека патувањето ќе биде целосно приватно. Тој наведе дека не користел средства од премиерскиот буџет и дека наместо владин авион избрал комерцијален лет.
Сепак, точната сума што ја чинел одморот не беше објавена. Пред самитот на НАТО, Маѓар престојувал во Истанбул и Коџаели, каде посетил спомен-куќа посветена на Имре Текели, историски лидер од унгарското минато.
Неговото останување во Турција привлече внимание не само поради приватниот дел од посетата, туку и поради начинот на кој премиерот одговори на критиките за спојување на службено патување и семеен одмор. Маѓар порача дека и покрај приватниот престој, останал во контакт со членовите на владата и бил информиран за важните одлуки во земјата.
