Во нападите со беспилотни летала со долг дострел врз руските региони Татарстан и Ростов во текот на ноќта се оштетени петрохемиски комплекс, енергетска инфраструктура и важен логистички мост. Во Ростовската област, во Таганрог, загинал главниот инженер на една трафостаница, а четири лица се повредени, потврди регионалниот гувернер Јуриј Сљусар.

Тројца мажи и една жена биле хоспитализирани откако остатоци од соборени дронови паднале врз нивните возила на автопат и на бензинска пумпа.

Оштетени две трафостаници

Во нападот биле оштетени две трафостаници во Таганрог, меѓу кои и една што ја снабдува со електрична енергија железничката инфраструктура. Во трафостаницата во градската населба Шубин избувнал пожар, а далноводите меѓу железничките станици Таганрог-Патнички и Михајловка останале без напојување.

Поради оштетувањето на енергетската инфраструктура, железничкиот сообраќај бил прекинат, соопшти гувернерот.

Според анализата на јавно достапни податоци што ја направил независниот руски медиум АСТРА, една од целите на нападот била трафостаницата Т-10 (Таганрог-10), со напон од 220 киловолти. Станува збор за важен енергетски јазол што ги снабдува Таганрог и неговата индустриска зона, вклучително и големи металуршки претпријатија како Таганрошкиот металуршки комбинат (ТАГМЕТ).

Погоден мост над железничка пруга

Каналот „Ексилнова плус“ објави фотографии на кои се гледаат оштетувања на мостот Мељентјевски во Ростовската област по ноќниот напад. Мостот ги поврзува населените места Николаевка и Андреево-Мељентјево и е дел од обиколниот пат што води кон автопатот Р-280 во правец на окупираниот Мариупол.

Сообраќајот преку мостот е затворен, а возилата се пренасочуваат преку Таганрог и селото Покровскоје. Во нападите биле оштетени вкупно пет возила, од кои четири во близина на мостот, а едно на бензинска пумпа.

Сљусар соопшти дека руската противвоздушна одбрана во текот на ноќта соборила околу 50 дронови над Таганрог, Ростов на Дон и седум окрузи во Ростовската област. Тој предупреди дека и понатаму постои опасност од нови напади со беспилотни летала.

Пожар во петрохемискиот комплекс „Нижнекамскнефтехим“

Истовремено, во руската Република Татарстан бил нападнат петрохемискиот комплекс „Нижнекамскнефтехим“, каде што избувнал пожар. Жителите на Нижнекамск известиле дека пред експлозиите ги слушнале моторите на дроновите што летале на мала височина. На социјалните мрежи се појавија снимки на кои се гледа голем пожар во кругот на петрохемиската фабрика.

Градоначалникот на Нижнекамск, Радмир Бељаев, потврдил дека градот бил цел на напад со беспилотни летала и дека се оштетени објекти во индустриската зона. Тој не соопштил детали за обемот на штетата ниту за конкретните погони што биле погодени.

„Нижнекамскнефтехим“ е еден од најголемите петрохемиски производители во Русија и Европа и претставува еден од клучните делови на хемиската индустрија во Татарстан. Фабриката е специјализирана за производство на синтетичка гума, пластика и етилен – материјали што широко се користат во цивилната индустрија, но и во синџирите на снабдување на руската воена индустрија.

Нападите во Татарстан и Ростовската област се дел од сè поинтензивните украински удари со ракети и дронови со долг дострел врз руската воена индустрија, енергетската инфраструктура и клучните логистички правци.