Од почетокот на годината во Демократска Република Конго се регистрирани повеќе од 60.000 случаи на колера, а околу 1.800 заразени лица починале. Според генералниот директор на Светската здравствена организација (СЗО), Тедрос Аданом Гебрејесус, станува збор за „најтешката епидемија на колера во последните неколку децении“ во оваа централноафриканска земја.

Стапката на смртност годинава изнесува околу три проценти, што СЗО го оценува како многу високо ниво за заболување од колера.

Источниот дел на ДР Конго е особено загрозен

Најголем дел од досега регистрираните случаи се во источните провинции Северно Киву и Јужно Киву. Двата региони веќе долго време се погодени од герилски судири во кои учествуваат бројни вооружени групи, меѓу кои се издвојува милицијата М23, поддржана од Руанда. Дел од овие подрачја сега се под контрола на бунтовниците, кои практично ја презеле одговорноста за спроведување и координација на мерките за јавно здравје.

Ваквите околности значително го отежнуваат спроведувањето мерки на национално ниво, како и способноста на централната влада да го координира одговорот на епидемијата, особено во Северно и Јужно Киву.

Истовремено, ДР Конго се соочува и со најсмртоносната епидемија на ебола во својата историја, поради што заштитата на јавното здравје стана еден од главните приоритети.

Милиони жители на Киншаса стравуваат од ширење на заразата

По случаите регистрирани во Северно и Јужно Киву, пристигнале нови извештаи за појава на колера долж сливот на реката Конго. Последните три случаи биле пријавени во населбата Кингабва, во источниот дел на престолнината Киншаса. Многумина стравуваат дека актуелната сезона на дождови би можела дополнително да го поттикне ширењето на болеста, која се пренесува преку контаминирана вода.

Меѓу населението расте стравот од нова епидемија на колера. Еден жител на населбата Кингасани во Киншаса изјавил за Дојче веле дека луѓето се исплашени.

„Ги миеме рацете по секој контакт. Колерата е болест што убива брзо“, рекол жителот, кој сакал да остане анонимен.

Друг жител на Киншаса изразил загриженост дека „во Киншаса нема здравствени власти“, иако, строго земено, тоа не е точно. Здравствената управа на Киншаса, односно Провинциската здравствена дирекција (ДПС), на дел од жителите им е непозната, додека други немаат добро мислење за неа поради начинот на кој во минатото се справувала со кризите во јавното здравство.

За време на последната епидемија, во февруари 2026 година, повеќе од 80 проценти од заразените биле концентрирани во пет здравствени окрузи во Киншаса: Лимете, Кингабва, Каламу 2, Бинза Озон и Кингасани.

Светската здравствена организација стравува дека оваа заразна цревна болест повторно би можела да се прошири во густо населената престолнина, а здравствената управа би можела да биде преоптоварена.

„Лекари без граници“: Потребни се превентивни мерки низ целиот Конго

Естер ван дер Ворд, заменичка на координаторот на организацијата „Лекари без граници“ (МСФ) во Демократска Република Конго, изјавила за Дојче веле дека основниот проблем често е недостигот од пристап до безбедна вода за пиење и соодветни санитарни услови. Додала дека лошата хигиена на рацете исто така може да придонесе за ширење на болеста.

„Колерата првенствено се пренесува со консумирање вода или храна контаминирани со бактерии“, објаснила ван дер Ворд, посочувајќи дека МСФ значително ги засилила активностите за справување со епидемијата, особено во провинциите Северно и Јужно Киву. „Нашиот одговор опфаќа обезбедување медицинска нега, пристап до безбедна вода за пиење и санитарни услови, како и спречување на ширењето на колерата во локалните заедници“, додала таа.

Сепак, според неа, тоа не е доволно. Ван дер Ворд смета дека властите низ Конго треба да го напуштат пристапот кон епидемиите што главно се заснова на реакција откако ќе се појави заразата и повеќе да инвестираат во превенција.

Колерата може да биде смртоносна ако не се лекува

Колерата предизвикува брза дехидратација и, без соодветна медицинска нега, може да биде смртоносна. Особено загрозени се ранливите групи на население, како и сиромашните заедници што живеат во пренаселени услови.

Бернар Нсоголо, лекар во здравствен центар во источниот дел на Киншаса, ги повикува жителите на подрачјата со висок ризик значително да ги засилат хигиенските мерки.

„Пијте безбедна вода – поточно, вода што е прочистена и добро заштитена“, изјавил тој за Дојче веле. Тој нагласил и дека храната мора темелно да биде термички обработена, а треба да се избегнуваат суров зеленчук и неизлупено овошје. Естер ван дер Ворд исто така повикува на итно дејствување и ја истакнува важноста од прочистување на водата со хлорирање, заштита на изворите на вода од контаминација, како и обновување и одржување на системите за водоснабдување.

Покрај тоа, таа се залага за спроведување кампањи за орална вакцинација против колера. Иако нивната ефикасност може да биде ограничена, вакцините сепак обезбедуваат дополнителна и важна заштита, особено за заедниците изложени на висок ризик. Сепак, постои уште еден проблем што погодува голем дел од Конго: во некои области луѓето воопшто немаат пристап до здравствена заштита, предупредува ван дер Ворд.

„Во одредени области транспортот на залихи може да чини околу 15.000 долари по камион, а поради лошите патишта и небезбедната ситуација, испораката може да трае и неколку месеци“, додала таа.

Според ван дер Ворд, официјалниот одговор на епидемијата засега е далеку од доволен во однос на обемот на потребите, особено во подрачјата каде што здравствената заштита е недостапна или ограничена.

„Во такви околности, заедниците во ДР Конго и понатаму ќе бидат изложени на чести појави на колера“, предупредила таа.