„Travel to Europe“ треба да им овозможи на патниците однапред да ги внесат податоците и да ја скратат проверката на граница, но засега услугата функционира само во Шведска и Португалија.
Европската Унија воведува нова дигитална услуга што треба да го олесни преминувањето на надворешните граници во рамките на системот EES. Апликацијата „Travel to Europe“ е замислена како алатка преку која патниците однапред ќе можат да ги внесат потребните податоци и така да ја забрзаат граничната проверка.
Новиот систем EES го менува досегашниот начин на евидентирање на влезовите и излезите од Европската Унија. Наместо печати во пасош, секое преминување се регистрира дигитално, со фотографирање и земање отпечатоци од прсти. Системот важи и за граѓаните на Македонија кои патуваат кон земјите од ЕУ.
Иако целта на EES е поголема контрола и поефикасна евиденција, неговото воведување на дел од граничните премини создаде застои и подолги чекања. Токму затоа ЕУ ја воведува апликацијата „Travel to Europe“, достапна преку Google Play и Apple Store, со очекување дека ќе го намали метежот на границите.
Засега, сепак, апликацијата функционира само во две земји — Шведска и Португалија. Патниците од регионот особено го очекуваат нејзиното проширување кон Грција, една од најчестите туристички дестинации за граѓаните на Македонија.
Преку апликацијата, корисниците можат однапред да ги достават своите податоци, да го скенираат биометрискиот пасош преку NFC технологија, да направат селфи за идентификација и да одговорат на основни прашања за целта и времетраењето на патувањето.
По обработката на податоците, патникот добива баркод што треба да го покаже на службеникот на граничниот премин. Во теорија, ова би требало да ја скрати постапката и да го намали времето на чекање. Податоците треба да се достават најмалку 72 часа пред патувањето.
Но системот сè уште е во почетна фаза. Дел од раните корисници пријавуваат технички проблеми, а на одредени гранични премини сè уште нема доволна инфраструктура за таканаречени „брзи ленти“ за патниците што ја користат апликацијата.
Официјалните информации за тоа кога услугата целосно ќе се прошири на сите релевантни гранични премини сè уште не се потврдени.
Воведувањето на „Travel to Europe“ доаѓа во момент кога туристичката сезона се приближува, а европските институции се обидуваат да го намалат ризикот од долги редици и одложувања на границите.
Дали апликацијата навистина ќе го забрза преминувањето или ќе стане уште еден административен чекор за патниците, ќе се покаже во наредните месеци, кога системот ќе се тестира пошироко на терен.
