Американскиот претседател Доналд Трамп и првата дама Меланија Трамп извозеа почесен круг во претседателската лимузина „Ѕвер“ (The Beast), означувајќи го почетокот на историската трка „Freedom 250 Grand Prix“ во Вашингтон. Ова е прва професионална улична трка во историјата на главниот град на САД, организирана како дел од прославата за 250-годишнината од независноста на земјата. Победник на трката беше американскиот возач Кајл Кирквуд, кој стигна до својата седма победа во Индикар кариерата.
President Donald Trump takes a lap in "The Beast" before today's Freedom 250 🇺🇸@realDonaldTrump | @POTUS pic.twitter.com/sHf0dsJQP5
— FOX Sports (@FOXSports) August 23, 2026
Патеката со должина од 4,3 километри опфати вкупно 147 кругови околу најзначајните споменици на Вашингтон, минувајќи покрај споменикот на Вашингтон, Националната алеја и зградата на Конгресот. Возачите поминаа точно 250 милји (402 километри) во чест на јубилејот.
Веднаш по почесниот круг на претседателската двојка, над градот имаше прелет од новиот претседателски авион „Air Force One“, придружуван од воено воздухопловство, со што официјално беше даден знак за старт.
Вашингтон е познат како град со најниско ограничување на брзината во САД (89 km/h), но болидите на Индикар развиваа брзина и до 306 km/h. Настанот наметна исклучителни безбедносни мерки: шахтите на улиците беа заварени и зашрафени, асфалтот беше специјално саниран, а аеродромот „Роналд Реган“ беше затворен за сообраќај цели три часа.
President Donald Trump waves the green flag and the Freedom 250 is underway!@realDonaldTrump | @POTUS pic.twitter.com/gjbOMLhvDU
— FOX Sports (@FOXSports) August 23, 2026
Националната галерија на уметност (National Gallery of Art) претходно спроведе специјални тестирања за вибрации за да утврди дали нејзината непроценлива уметничка колекција може да претрпи оштетувања од звукот и силата на тркачките мотори.
Повеќе од 140.000 гледачи го следеа настанот во живо, при што голем дел од билетите беа распределени бесплатно преку јавна лотарија за граѓаните.
„Ова е нешто навистина уникатно што можеби никогаш повеќе нема да го видиме. За американски возач, чувството да се вози со над 300 на час низ престолнината за 250-годишнината од државата е нереално“, изјави возачот Џозеф Њугарден за извештајот на BBC.
Овој настан е дел од низата специјални манифестации со кои Белата куќа го одбележува јубилејот на нацијата, вклучително и претходно одржаните спортски манифестации и официјални церемонии.
