Американскиот претседател Доналд Трамп предложи сојузната држава Ново Мексико да биде преименувана во „Нова Америка“. Предлогот го објави во неделата на социјалната мрежа Truth Social, само неколку дена откако со извршна наредба го промени името на езерото Онтарио во „Езеро Америка“.
Трамп објави фотографија со контурата на сојузната држава, на која зборот „Mexico“ е прецртан со црвено и заменет со „America“. Во објавата не даде дополнително објаснување, а Белата куќа не најави официјална постапка за промена на името.
Сепак, Трамп нема уставно овластување сам да го преименува Ново Мексико. Додека претседателот може да влијае врз имињата на географски обележја во федералните бази на податоци, промената на името на сојузна држава би морала да започне во самата држава.
Трамп неодамна на сличен начин го промени името на езерото Онтарио, додека во јануари 2025 година, на првиот ден од својот втор мандат, со извршна наредба го преименува Мексиканскиот Залив во „Американски Залив“.
Остри реакции во Ново Мексико
На предлогот веднаш реагираше гувернерката на Ново Мексико, демократката Мишел Лујан Гришам, која го обвини Трамп дека со ваквите потези се обидува да го сврти вниманието од други проблеми.
„За името на Ново Мексико не се разговара“, порача таа.
Гришам на платформата X напиша дека додека претседателот се обидува да им го одвлече вниманието на Американците од, како што го нарече, „катастрофалниот“ конфликт во Иран, цените на горивата продолжуваат да растат.
„Додека Белата куќа го троши времето на цртање карти, Нуево Мексико е зафатено со работа“, напиша таа.
На Трамповата објава реагираше и демократскиот сенатор Мартин Хајнрих.
„Три работи секогаш ќе ги нарекувам со нивните вистински имиња: Мексиканскиот Залив. Езерото Онтарио. Ново Мексико“, напиша тој на X.
Името е постаро од САД
Името на американската сојузна држава е постаро од самите Соединети Американски Држави и потекнува од 16 век, според документите на американското Биро за индиски прашања за потеклото на имињата на сојузните држави. Трамп и претходно покажуваше интерес за преименување географски локации, што неговите критичари го толкуваат како демонстрација на претседателската моќ.
Одлуката за промена на името на езерото Онтарио беше донесена во период на тензии во трговските односи меѓу САД и Канада. Набргу по потпишувањето на наредбата, Трамп најави дека би можел да размислува и за промена на името на еден од океаните што ги опкружуваат САД.
„Имаме залив и имаме езеро. Сега ни останува уште само океан. Можеби ќе мора да го смениме името на Атлантскиот и/или Тихиот Океан. Можеби ќе ги смениме и двата“, изјави Трамп.
