Поранешниот голман на Арсенал, Јувентус и австриската репрезентација, Александар Менингер, загина на 48-годишна возраст во тешка сообраќајна несреќа. Според полициските информации, трагедијата се случила утринава околу 8:20 часот на железнички премин во близина на Салцбург, кога неговиот автомобил бил удрен од воз.
Спасувачките служби интервенирале веднаш по несреќата и се обиделе да го реанимираат Менингер, користејќи и дефибрилатор, но обидите биле неуспешни. Според полицијата, возот го оттурнал возилото на одредено растојание, додека машиновозачот не бил повреден.
Кариера исполнета со успеси
Менингер ја започна својата кариера во Салцбург, а во текот на професионалниот пат настапуваше за бројни европски клубови, вклучувајќи ги Сиена, Удинезе и Аугсбург. Во Арсенал играше од 1997 до 2002 година, настапувајќи на 64 натпревари и освојувајќи ја Премиер лигата и ФА Купот. Иако најчесто беше резерва на легендарниот Дејвид Симан, доби значајна шанса во сезоната 1997/98 и остави силен впечаток.
Особено се истакна во победите против Вест Хем во ФА Купот и против Манчестер јунајтед на „Олд Трафорд“.
Репрезентативна кариера и признанија
За репрезентацијата на Австрија забележа 33 настапи, а беше дел и од составот на Европското првенство во 2008 година, кое се одржа во неговата татковина. Во март 1998 година беше прогласен за играч на месецот во англиската Премиер лига признание кое го потврди неговиот квалитет и влијание на теренот
Спортскиот директор на Фудбалскиот сојуз на Австрија, Петер Шетел, изјави дека Менингер бил „исклучителен амбасадор на австрискиот фудбал“, истакнувајќи ги неговиот професионализам, смиреност и сигурност.
Неговата смрт претставува голема загуба за фудбалската заедница, а неговите успеси и придонес ќе останат трајно запаметени.
