Топол и сув воздух со потекло од Сахара се движи кон Европа, носејќи стабилно и претежно сончево време во голем дел од континентот. Иако дневните температури растат брзо, студените ноќи и големите температурни разлики остануваат карактеристика на почетокот на неделата.

Над Атлантикот се наоѓа длабока и бавно подвижна циклонска област, со центар меѓу Исланд и Велика Британија. Нејзиното движење кон исток е блокирано од поле на висок воздушен притисок над централна и источна Европа. Пред циклонот, воздушното струење од југоисток носи топла и сува воздушна маса со потекло од Сахара кон европското копно.

Во областите под влијание на висок воздушен притисок преовладува стабилно и претежно ведро време. По изгрејсонце температурите брзо се зголемуваат, а дневната температурна разлика на места може да достигне и 20 степени. Тоа значи дека и покрај топлите попладниња, утрата остануваат релативно студени. Во внатрешноста, поради ведрите ноќи, локално е можен и слаб мраз при тлото.

Стабилно и потопло во следните денови

Во текот на денешниот ден се очекува сончево време, со мала дневна облачност, особено во планинските предели. Во вторник времето ќе остане стабилно и сончево, а температурите ќе бидат за еден до два степени повисоки во однос на почетокот на неделата.

Прогнозите укажуваат дека стабилното и релативно топло време би можело да се задржи во текот на целата недела. Според подолгорочните прогнози, позначајна промена на времето со врнежи и пад на температурите се очекува дури околу 10 октомври.