Дваесет и едногодишна девојка од Битола пријавила дека подолг период била изложена на физичко и психичко насилство од својот партнер, а по последниот пријавен напад, во кој тврди дека тој ја давел, осомничениот избегал низ прозорец од полициската станица во Битола, објави „Слободен печат“.

Според сведоштвото на мајката, Бети Ангеловска, нејзината ќерка околу година и половина живеела во страв и била изложена на насилство. На 10 ноември девојката пријавила дека партнерот физички ја нападнал, при што, како што тврди, ѝ ги затворал носот и устата и ја спречувал да дише.

По пријавата следувала полициска интервенција, но случајот добил дополнителна сериозност кога пријавениот успеал да избега од полициските простории.

Министерството за внатрешни работи потврдило дека лицето избегало низ отворен прозорец за време на преземањето полициски дејствија. За околностите под кои се случило бегството е известен Одделот за внатрешна контрола.

Во меѓувреме, девојката е сместена во шелтер-центар, а нејзината мајка јавно бара надлежните институции да преземат мерки за нејзина заштита. Според нејзиното сведоштво, судското рочиште било одложено за 18 ноември бидејќи осомничениот не бил пронајден.

Случајот отвора прашања за постапувањето на институциите по пријави за родово базирано насилство, особено кога постои непосредна загриженост за безбедноста на жртвата.

Целосното сведоштво на мајката, хронологијата на пријавите и одговорите од надлежните институции се достапни во оригиналната авторска сторија.