Легендарниот рок-бенд The Rolling Stones официјално го најави својот нов студиски албум „Foreign Tongues“, кој ќе биде објавен на 10 јули преку Universal Music Group и ќе содржи 14 нови песни.
Албумот веќе привлекува големо внимание во музичката јавност, особено по најавата дека на него ќе гостуваат големи имиња како Paul McCartney и Robert Smith, што дополнително ги зголемува очекувањата кај фановите.
Во изминатиот период низ повеќе светски метрополи се појавија билборди со препознатливото лого на бендот и натписот „Foreign Tongues“ на различни јазици, што првично предизвика шпекулации за ново издание. Подоцна, Mick Jagger и останатите членови го потврдија албумот и преку социјалните мрежи, ставајќи крај на шпекулациите.
Пред официјалната најава, бендот веќе објави тизер материјал под псевдонимот „The Cockroaches“, заедно со енергичниот сингл „Rough and Twisted“, кој беше прв сигнал за новата ера на бендот.
Денес, 5 мај, дигитално беше објавен и водечкиот сингл „In The Stars“, додека неговото физичко издание се очекува на 15 мај. Со „Foreign Tongues“, The Rolling Stones уште еднаш потврдуваат дека и по децении на сцена остануваат активни и релевантни во светската музичка индустрија, продолжувајќи да ја обликуваат рок-историјата.
