Три момчиња на возраст од 15 до 19 години биле повредени во тепачка што се случила пред средно училиште во Тетово, во која биле употребени остри предмети. Полицијата привела 15-годишник од Желино, осомничен дека нападнал две момчиња.
Според СВР Тетово, случајот бил пријавен вчера во 16:40 часот од Клиничката болница во Тетово, откако таму биле донесени А.К., 19 години, и М.А., 18 години, со повреди од остар предмет.
„По преземени мерки, утврдено е дека тие пред средно училиште во Тетово биле нападнати со остар предмет од 15-годишникот, кој исто така се здобил со повреди“, изјави портпаролот на СВР Тетово, Фатмир Реџепи.
Полициски службеници го лишиле од слобода 15-годишникот, а на местото на инцидентот биле пронајдени нож и шрафцигер.
За случајот е известен јавен обвинител, а од СВР Тетово најавуваат дека по целосно документирање ќе следуваат соодветни пријави.
