Македонскиот народен театар на 29 септември ќе биде домаќин на Казалиште „Марин Држиќ“ од Дубровник, кое пред скопската публика ќе ја изведе претставата „Види како Локрум мие заби“. Претставата е работена според драматизација на истоимениот роман на хрватската писателка Ивана Ловриќ Јовиќ, во режија на Паоло Тишљариќ.

Претставата претставува емотивна приказна што се одвива во текот на една ноќ. Дејството е сместено помеѓу моментот кога главната протагонистка ја дознава веста за смртта на својот татко и неизбежното соочување со таа загуба.

Низ призмата на четири генерации жени од едно исто семејство, драмскиот текст ги истражува сеќавањата, тагата, љубовта и сложените роднински релации. Фокусот е ставен врз начините на кои поединецот се справува со болката.

Овој сценски проект е копродукција меѓу Казалиште „Марин Држиќ“ и Дубровничките летни игри, а драматизацијата на романот ја потпишува Маријана Фумиќ. По премиерната изведба, ансамблот настапи на фестивали и сцени во Хрватска, Босна и Херцеговина, Црна Гора и Турција.

Актерската екипа ја сочинуваат Марија Шегвиќ / Ирена Тереза Прпиќ, Сандра Лончариќ, Миреј Станиќ, Ања Матишиќ, Перица Мартиновиќ, Ника Ласиќ, Борис Матиќ и Бојан Берибака.

Од МНТ наведуваат дека со ова гостување ја продолжуваат меѓународната соработка со дубровничкиот театар. Влезниците за изведбата се веќе пуштени во продажба преку билетарницата и онлајн системот на театарот.