За првпат еден фудбалски Мундијал нема да се гледа на каналите на Македонската радиотелевизија, откако на листата на ФИФА како носител на преносите за Македонија е наведена „Арена спорт“.

За помалку од еден месец почнува Светското фудбалско првенство во САД, Канада и Мексико, но македонските гледачи овојпат натпреварите нема да ги следат на каналите на Македонската радиотелевизија. Според објавената листа на носители на ТВ-правата, ФИФА за Македонија ја наведува „Арена спорт“ како носител на преносите.

Ова значи дека, за првпат, најголемиот фудбалски турнир нема да биде дел од програмата на МРТ, која досега редовно ги пренесуваше најголемите репрезентативни фудбалски натпреварувања. Исклучок беше Европското првенство во 2008 година, кога правата ги имаше „Алсат“.

Иако засега не е официјално потврдено во каков формат ќе оди преносот за македонската публика, според најавите, натпреварите би требало да бидат достапни со коментар на македонски јазик.

Светското првенство во 2026 година ќе биде најголемото досега. На турнирот ќе учествуваат 48 репрезентации, а наместо досегашните 64, ќе се одиграат 104 натпревари. Турнирот ќе се одржи во САД, Канада и Мексико.

Промената на носителот на ТВ-правата е значајна за домашната публика, бидејќи Мундијалот традиционално се следеше преку јавниот сервис. Сега фокусот ќе биде на тоа како ќе биде организиран преносот, дали сите натпревари ќе бидат достапни за гледачите и под кои услови.