Судијата Тони Граф ја донесе одлуката по сослушувањето на доказите на обвинителството, кое тврди дека има цврста основа Робинсон кривично да одговара за пукањето врз 31-годишниот американски конзервативен активист Чарли Кирк. Кирк беше убиен со еден истрел на универзитетски кампус во Јута додека одржуваше една од своите препознатливи јавни дебати, а случајот предизвика силни општествено-политички реакции ширум САД.
Обвинителството го товари Робинсон по вкупно седум точки, меѓу кои централна е квалификацијата за тешко убиство. Обвинителите пред судот тврдеа дека истрелот не бил само напад врз активистот, туку директно го загрозил животот на присутните студенти и публика, што според законите во Јута претставува правен основ за изрекување смртна казна. Како клучен материјален доказ беа презентирани и резултатите од ДНК анализата, според кои траги од обвинетиот биле пронајдени на оружјето со кое било извршено убиството.
Одбраната остро се спротивстави на ваквата квалификација на делото, барајќи да се отфрли можноста за најтешката казна. Адвокатката Стејси Висер аргументираше дека станува збор за изолиран чин, со еден куршум насочен исклучиво кон една жртва, без повторно полнење на оружјето или пукање кон толпата, додавајќи дека нема потврда за реална опасност по други лица. Дополнително, правниот тим на Робинсон ја оспори и веродостојноста на приложените форензички ДНК анализи.
Во делот за мотивот, обвинителот Рајан Мекбрајд посочи дека нападот бил идеолошки мотивиран поради јавните ставови на Кирк против истополовите бракови и правата на трансродовите лица. Обвинението приложи и приватна порака што Робинсон му ја испратил на својот поранешен партнер, во која навел дека стрелал затоа што „одредени форми на омраза не можат да се решат со преговори“. Адвокатите на одбраната возвратија дека пораката е извадена од контекст и дека зборот не може автоматски да се толкува како политичка омраза кон активистот.
