Во Основниот кривичен суд во Скопје започна судската постапка против девет полициски службеници, обвинети за злоупотреба на службената положба во врска со издавањето лиценца за работа на дискотеката „Пулс“ во Кочани. Случајот се однесува на институционалните проверки што, според обвинението, не биле спроведени целосно пред објектот да добие дозвола за работа.
На обвинителна клупа се Димче Аврамов, Јане Трајчев, Александар Атанасов, Влатко Илиев, Александар Темелков, Влатко Наумов, Боби Гидиоски, Гоце Иванов и Александар Максимов.
Според обвинението, тие како дел од институционалната процедура не ги извршиле потребните проверки поврзани со јавниот ред и мир, безбедносните аспекти и сообраќајните услови. Овие проверки биле предуслов за добивање дозвола за работа на угостителскиот објект.
Обвинителството тврди дека, наместо детална анализа, била дадена согласност врз основа на нецелосни или неизвршени контроли, со што било овозможено дискотеката да добие лиценца и да продолжи да функционира.
Трагедијата во „Пулс“ се случи на 16 март 2025 година, за време на концерт на групата ДНК, кога нелегално поставена пиротехника предизвика пожар. Огнот брзо се проширил поради запалив материјал на таванот. Во несреќата животот го загубија 63 лица, а повеќе од 230 беа повредени.
Обвинителката за организиран криминал Спасенка Андонова посочи дека полицијата имала обврска да утврди дали објектот ги исполнува условите за безбедност, вклучително и сообраќајните решенија, паркинг-капацитетот и евентуалните претходни прекршоци. Според неа, токму пропустите во тие проверки овозможиле објектот да продолжи со работа.
Судењето го води судијката Ленка Давиткова. На почетокот од рочиштето, дел од одбраната побара судот да помогне во обезбедување документи од Министерството за внатрешни работи, Бирото за јавна безбедност и Управата за јавни приходи. Барањата се однесуваат на прибавување докази, декласификација на одредени материјали и овозможување увид за вештачење.
Поради недоставени документи, судењето е одложено. Продолжението е закажано за 1 јуни, до кога се очекува да се обезбедат потребните докази и да се изврши нивна анализа.
Овој предмет е дел од пошироката истрага за пропустите што доведоа до една од најтешките трагедии во поновата историја на земјата, во која се опфатени повеќе групи полициски службеници и раководни лица.
