Во Скопје, во рамките на бесплатната стрип школа за средношколци, петнаесет млади автори создадоа свој оригинален свет на ликови, кој на крајот се спојува во заедничка приказна под наслов Академијата М.А.С.С. (Македонска Агенција за Спас на Светот). Проектот претставува уникатен пример на младинска креативност и тимска работа во современиот македонски стрип.

Школата се одржуваше од јануари до мај 2026 година и беше водена од македонските автори Здравко Гиров и Давор Драмиќанин, кои ги воведоа учениците во процесот на создавање ликови, сценарио и визуелно раскажување. Во текот на обуката, секој учесник разви сопствен јунак, кој подоцна беше интегриран во заеднички наративен универзум.

Проектот е во организација на Здружението за промовирање на стрип културата „Макстрипови“ од Скопје и трета година по ред е дел од фестивалот „Стрип Трип“. Часовите се одржуваа во НВО Центарот при Младинскиот културен центар (МКЦ), со поддршка од Град Скопје и Општина Центар, кои обезбедија простор и финансиска помош за реализација и печатење на изданието.

Во рамките на школата се создадени над 100 оригинални стрип табли, што претставува значаен резултат за една младинска работилница од ваков тип. Организаторите истакнуваат дека проектот има промотивен карактер, но и поширока цел да ги мотивира младите уметници да продолжат со креативно творештво и развој во областа на стрипот.

Завршното издание ќе биде промовирано на четвртото издание на меѓународниот фестивал „Стрип Трип“, на 7 јуни 2026 година во 12:00 часот.