Легендарниот режисер Стивен Спилберг, кој со години беше еден од најголемите поддржувачи на кино-прикажувањето, го ублажи својот став кон стриминг платформите. Иако во минатото жестоко ги критикуваше сервисите како Нетфликс и сметаше дека нивните продукции не треба да се натпреваруваат за Оскарите, денес е подготвен за соработка под одредени услови.

Спилберг изјави дека би снимил филм за Нетфликс само доколку проектот од самиот почеток биде создаден за домашно гледање, а не како филм наменет за кино-салите. Според него, постои јасна разлика меѓу содржина која е направена за големото платно и онаа што е создадена за гледање дома.

Во претходни интервјуа режисерот нагласуваше дека ништо не може да го замени доживувањето на филм во кино, каде публиката заеднички ја следи приказната на големо платно. Сепак, денес признава дека би можел да работи со стриминг платформа доколку концептот е прилагоден на таков начин на дистрибуција.

Тој неодамна откри и дека за својот нов филм не користел вештачка интелигенција за создавање на звучните ефекти, туку се потпрел на традиционални техники и обработени звуци од животни, останувајќи верен на класичниот пристап во филмската продукција.

Во својата богата кариера, Спилберг режираше повеќе од 30 долгометражни филмови и создаде некои од најпознатите остварувања во историјата на кинематографијата. Добитник е на бројни престижни награди, меѓу кои Оскари, Златни глобуси, БАФТА и Еми признанија, што го вбројува меѓу најуспешните филмски автори на сите времиња.