Шпанскиот селектор Луис де ла Фуенте го објави списокот од 26 фудбалери за Светското првенство, а самата објава помина на необичен начин. Имињата на играчите не ги открија ниту селекторот ниту фудбалската федерација, туку во процесот беа вклучени шпанскиот крал Фелипе Шести и кралицата Летиција, додека списокот го прочитаа обични граѓани.

Со ова беше заокружен долгиот процес што Де ла Фуенте го започна во март 2023 година. Свеченоста во Мадрид ја водеше Хесус Навас, член на генерацијата што во 2010 година ја освои светската титула.

Во изминатиот период селекторот испроба 77 играчи, а Шпанија во меѓувреме го освои Европското првенство и Лигата на нации, а лани беше и финалист во Лигата на нации. Сепак, главниот фокус цело време беше Светското првенство.

Враќање на отпишаниот стопер

Бидејќи основата на тимот веќе е изградена околу играчи како Микел Мерино, Нико Вилијамс и Ламин Јамал, немаше премногу дилеми околу списокот. Главните прашања беа поврзани со позицијата трет голман и со едно место во одбраната.

Дилемата кај голманите е решена во корист на Жоан Гарсија од Барселона, додека Алекс Ремиро отпадна од списокот.

Најголемото изненадување е повикот за Ерик Гарсија. Стоперот на Барселона не играл за репрезентацијата уште од Светското првенство во Катар и досега не беше дел од плановите на Де ла Фуенте за сениорскиот тим.

Покрај него, во одбраната е вклучен и Марк Пубил, благодарение на одличната сезона во Атлетико Мадрид, додека местата на Лапорт и Кубарси беа сигурни. Празнината по повредата на Фермин ќе ја пополни Јереми Пино.

Списокот на Шпанија за Светското првенство

Голмани: Унаи Симон, Давид Раја, Жоан Гарсија.

Одбрана: Педро Поро, Маркос Љоренте, Лапорт, Кубарси, Пубил, Ерик Гарсија, Кукуреља, Грималдо.

Среден ред: Родри, Зубименди, Педри, Микел Мерино, Фабијан Руиз, Дани Олмо, Гави.

Напад: Нико Вилијамс, Баена, Ојарзабал, Феран, Борха Иглесијас, Јереми Пино, Ламин Јамал, Виктор Муњоз.