Млад Македонец кој студира развој на видеоигри во Белгија најде необичен начин да проговори за еден од најголемите проблеми на Скопје. Стефан Филиповски ја создаде веб-апликацијата „Skopje Air 3D“, која главниот град го претвора во дигитален отворен свет, сличен на оние што играчите ги знаат од популарните видеоигри.

Апликацијата нуди целосен тридимензионален приказ на Скопје, во кој загадувањето се прикажува во реално време врз основа на официјалните мерења на квалитетот на воздухот. За приказот на улиците и зградите се користат просторни податоци од отворената платформа „OpenStreetMap“.

Корисниците можат виртуелно да шетаат низ скопските населби и да видат колку е намалена видливоста според моменталната концентрација на штетни честички во воздухот. Така бројките, кои често се апстрактни за граѓаните, стануваат нешто што може буквално да се види со очи.

Апликацијата овозможува и враќање во минатото. Корисниците можат да ги разгледаат податоците за најкритичните денови од претходните грејни сезони и да видат како изгледал градот во најзагадените денови или часови. Може да се симулира и зимската температурна инверзија, појава поради која студениот воздух заедно со загадувањето останува заробен во скопската котлина.

Посебен дел од апликацијата е наменет за граѓанско учество. Секој жител може директно на мапата да означи точни локации каде што се палат гуми или отпад, или каде што има диви депонии во неговото соседство. На тој начин граѓаните стануваат дел од решението, а не само жртви на загадувањето.

Корисниците можат да зачуваат и свои омилени локации и да добиваат известувања кога квалитетот на воздухот нагло ќе се влоши. Ова е практична алатка за брза проверка пред трчање, возење велосипед или прошетка со децата.

Скопје со години е меѓу најзагадените главни градови во Европа во зимските месеци. Главни причини се греењето на дрва и други цврсти горива, сообраќајот и индустријата, а проблемот дополнително го влошува географската положба во котлина. Затоа секоја иницијатива што го прави загадувањето видливо и разбирливо за граѓаните е добредојдена.

Проектот на младиот студент е веќе јавно достапен на страницата skopjeair3d.com и секој може да го испроба.