Американскиот претседател Доналд Трамп соопшти дека Сирија е отстранета од американската листа на држави спонзори на тероризмот, со што се отвора патот за поголема меѓународна економска соработка и обновата на земјата.

Во писмо до сирискиот претседател Ахмед ал Шара, Трамп истакнал дека неговата администрација работи на отстранување на сите пречки што ја попречуваат реконструкцијата на Сирија. Тој нагласил дека американски компании се подготвени да инвестираат милијарди долари во различни проекти, со цел да придонесат за економскиот развој и стабилизацијата на земјата.

Отстранувањето од листата значи укинување на дел од ограничувањата поврзани со американската финансиска помош, извозот на одбранбена опрема и одредени финансиски трансакции. Минатиот месец Трамп потпиша и извршна наредба за укинување на американските санкции кон Сирија, со што започна процесот на нејзино повторно вклучување во меѓународниот финансиски систем.

Покрај интересот од американските компании, неколку компании од Саудиска Арабија најавија инвестиции вредни милијарди долари како дел од поддршката за закрепнување на Сирија. Финансиска помош за обновата најавија и други земји од Заливот.

Трамп воедно позитивно се осврна и на сирискиот претседател Ахмед ал Шара, кој во минатото беше поврзан со Фронтот Ал Нусра, но ги прекина врските со групата во 2016 година. На крајот на 2024 година тој ја предводеше коалицијата што го собори долгогодишниот сириски претседател Башар ал Асад.