Срцевиот застој важи за ненадејна медицинска ургентност, но новото медицинско истражување покажува дека организмот испраќа предупредувачки знаци цели 24 часа однапред. Лекарите од медицинскиот центар „Сидарс-Синај“ во Лос Анџелес идентификуваа специфични симптоми на срцев застој кои се разликуваат кај мажите и жените. Препознавањето на овие рани индикатори може драматично да ги зголеми шансите за преживување пред да дојде до прекин на срцевата функција.

Според тимот предводен од д-р Сумит Чог, кој спроведе обемно истражување во Калифорнија и Орегон, срцевиот застој ретко се случува без никаква претходна најава. Истражувачите забележале дека половина од пациентите кои доживеале вонболнички срцев застој имале барем еден карактеристичен симптом во текот на претходниот ден.

Кај мажите, најчестиот ран симптом е ненадејна и силна болка во градите. Кај жените, пак, главен индикатор е неочекуваното и отежнато дишење. Дел од пациентите од двата пола пријавиле и ненадејни аритмии, пад на крвниот притисок или симптоми слични на грип.

Срцевиот застој настанува кога срцето поради електричен дефект или аритмија одеднаш престанува да пумпа крв низ телото. Првиот очигледен знак на самиот напад е губењето свест.

Со секоја измината минута без соодветна прва помош и реанимација, шансите за преживување опаѓаат за 10 проценти. Доколку медицинска помош не се пружи во првите десет минути, исходот речиси секогаш е фатален. Поради тоа, препознавањето на симптомите уште во фазата кога се појавуваат, 24 часа пред колапсот, овозможува навремено повикување итна медицинска помош и спречување на трагичен исход.