Семејствата на загинатите во пожарот во кочанската дискотека „Пулс“ најавуваат нов протест, незадоволни од темпото на постапките и од отсуството на целосна институционална одговорност. Нивната најава доаѓа додека на судењето се изнесуваат нови детали за начинот на кој објектот добивал лиценци за работа.
На последното рочиште, вештаците посочија дека во дел од барањата за издавање лиценци биле оставани непополнети полиња со клучни податоци. Недостигале информации за бројот на излези, пристапот до објектот, името на сопственикот и за тоа дали просторот бил земен под закуп.
Според нивното сведочење, во документацијата биле наведувани и неточни податоци за квадратурата на објектот. Во едно од барањата била прикажана површина од 400 квадратни метри, иако според наодите на вештаците објектот имал околу 600 квадратни метри.
Овие податоци се значајни бидејќи големината, капацитетот, бројот и распоредот на излезите, како и можноста за пристап на противпожарни и спасувачки екипи, се дел од основните услови што треба да се проверуваат при издавање дозвола за работа на угостителски објект.
Вештаците наведоа дека барањата не биле соодветно дополнувани и покрај празните полиња и неправилностите. На судењето се разгледува дали надлежните службеници биле должни да ја запрат постапката и да побараат комплетна документација пред да биде издадена лиценца.
Семејствата повторно ќе излезат на протест
Паралелно со судската постапка, семејствата на жртвите продолжуваат да бараат целосна и неселективна одговорност од сите лица и институции што имале улога во издавањето лиценци, контролата на објектот и спроведувањето на безбедносните прописи.
Тие за во среда најавуваат нов протест, со порака дека јавниот притисок ќе продолжи сè додека не бидат утврдени сите пропусти што овозможиле „Пулс“ да работи и покрај сериозните недостатоци. Родителите бараат и формирање собраниска анкетна комисија, која би ја испитала политичката и институционалната одговорност за трагедијата.
Според нив, судењето треба да ја утврди индивидуалната кривична одговорност, но тоа не смее да биде пречка Собранието да провери како постапувале институциите и зошто контролниот систем не ги спречил неправилностите.
Пожарот во „Пулс“ се случи на 16 март 2025 година. Во трагедијата загинаа 63 лица, а повеќе од 200 беа повредени. Судскиот процес сè уште трае и досега нема правосилна одлука за одговорноста на обвинетите.
