Еквадор одигра само 0:0 против Курасао, еден од најголемите аутсајдери во групата, со што сериозно си го отежна патот кон нокаут-фазата на Светското првенство. Додека Курасао го слави првиот бод во историјата на Мундијалите, во таборот на Еквадор владее разочарување по еден од најслабите резултати на турнирот.

И покрај тоа што Еквадор имаше дури 15 удари во рамките на голот, мрежата не се затресе ниту еднаш. Натпреварот заврши без голови, а според статистиката е поставен и рекорд по број на удари во рамки на гол во меч на Светско првенство без постигнат погодок.

Голманот на Курасао, Елој Рум, беше херој на натпреварот со 15 одбрани и практично сам му донесе историски бод на својот тим. По натпреварот, селекторот на Еквадор, Себастијан Бекачече, не го криеше разочарувањето, но порача дека неговата екипа сè уште има шанси за пласман понатаму. Тој истакна дека тимот создал доволно прилики за победа, но дека фудбалот понекогаш носи вакви резултати.

И покрај само еден освоен бод во првите две кола, Бекачече нагласи дека борбата не е завршена и дека Еквадор мора да продолжи да верува во успех до крајот на групната фаза. Во последното коло Еквадор го очекува тежок дуел против Германија, која веќе го обезбеди првото место во групата, додека јужноамериканската селекција ќе се обиде да остане во трка за пласман во осминафинале.