На самитот ЕУ – Западен Балкан, кој се одржува во Тиват, нема да биде усвоена заедничка декларација, иако таков документ беше практика на дел од претходните собири од овој формат. Причините за ваквата одлука засега не се познати, објавија регионалните медиуми повикувајќи се на информации од самитот.
Самитот во Тиват ги собра лидерите на Европската Унија и земјите од Западен Балкан, а главните теми се политиката на проширување, регионалната стабилност и понатамошната интеграција на регионот во ЕУ. Според Европскиот совет, состанокот се одржува шест месеци по претходниот самит во Брисел и треба да ја потврди важноста на односите меѓу ЕУ и Западен Балкан.
Во пресрет на самитот, во јавноста се појави и француско-германски нон-пејпер, за кој пишуваше „Ројтерс“. Документот предлага побрзо и постепено приближување на земјите-кандидатки до Европската Унија, преку пристап до делови од единствениот пазар и одредени европски програми пред полноправното членство.
Според овој предлог, кандидатските земји би можеле, доколку ги исполнат потребните стандарди, порано да се вклучат во области како студентска размена, истражување, енергетика, индустрија и делови од климатските политики на ЕУ. Се споменува и можност за учество на некои министерски состаноци и самити на ЕУ, но без право на глас.
Претседателот на Европскиот совет, Антонио Кошта, претходно порача дека ЕУ ќе бара начини за забрзување на пристапниот процес на шесте земји од Западен Балкан — Македонија, Албанија, Србија, Црна Гора, Косово и Босна и Херцеговина. Тој нагласи дека проширувањето останува важен политички и стратешки приоритет за Унијата.
Самитот се одржува во чувствителна политичка атмосфера, откако црногорските власти претходно вратија група од 87 српски државјани од аеродромот во Тиват, оценувајќи ги како безбедносен ризик. Овој случај дополнително ги засили тензиите пред состанокот, на кој присуствува и српскиот претседател Александар Вучиќ.
Иако нема да има Тиватска декларација, самитот останува важен политички сигнал за регионот. Очекувањата се дека разговорите ќе се фокусираат на практични чекори за поблиска интеграција, економско поврзување и нови модели за забрзување на европскиот пат на земјите од Западен Балкан.
