Соединетите Американски Држави одобрија можна продажба на оружје за Украина во вредност од 373,6 милиони долари, односно околу 319,5 милиони евра, соопшти Стејт департментот. Одлуката доаѓа како дел од континуираната поддршка за украинската одбрана.
Пакетот вклучува комплети за бомби со GPS-наведување од типот JDAM-ER, кои овозможуваат прецизно погодување цели на поголеми растојанија. Испораката ќе се реализира преку програмата за странска воена продажба.
Според официјалните информации, Украина ќе добие 1.200 репни комплети KMU-572 JDAM и 332 комплети KMU-556 JDAM, заедно со придружна опрема како системи за активирање, резервни делови, логистичка поддршка и техничка документација.
Од Стејт департментот посочуваат дека предложената продажба е во функција на надворешнополитичките и безбедносните цели на САД, како и за зајакнување на безбедноста на партнерска земја која има значајна улога во стабилноста и економскиот развој на Европа.
