Десетици компании ширум светот развиваат големи модели на вештачка интелигенција, но најголемиот дел од најкористените AI системи доаѓаат од две земји – САД и Кина.
Според анализа на податоците од платформата OpenRouter, која овозможува пристап до голем број AI модели и нивна употреба преку едно заедничко интерфејс-решение, американските компании сè уште имаат најголемо присуство меѓу најпопуларните модели, но нивната доминација постепено се намалува.
На листата на 50 најкористени AI модели дневно, американските компании како OpenAI, Google, Anthropic и Meta и понатаму имаат значаен удел. Сепак, кинеските компании бележат драматичен напредок. Бројот на кинески модели меѓу 50-те најкористени пораснал од само пет на почетокот на 2025 година на дури 20 модели во мај 2026 година.
Овој раст покажува дека Кина станува сè посериозен конкурент во глобалната трка за развој на вештачка интелигенција.
Меѓу платформите достапни преку OpenRouter се модели од водечки компании како OpenAI, Google, Anthropic, Meta, како и кинеските DeepSeek и Alibaba. И покрај глобалниот развој на AI технологијата, многу мал број модели меѓу најкористените доаѓаат од други региони. Од Европа се издвојува француската компанија Mistral AI, додека Канада е присутна преку моделите на Cohere.
Трката меѓу Вашингтон и Пекинг за лидерство во вештачката интелигенција станува едно од клучните технолошки и геополитички прашања. Контролата врз најмоќните AI модели може да има големо влијание врз иднината на индустријата, економијата, безбедноста и дигиталните услуги.
