Ирската нискобуџетна авиокомпанија Ryanair очекува цените на билетите во најсилниот дел од летната сезона да останат приближно на исто ниво како лани. Компанијата истовремено соопшти дека ризикот од недостиг на авионско гориво е намален, откако добавувачите ги засилиле испораките и бараат алтернативи за набавка надвор од регионот на Персискиот Залив.

Во фискалната година што заврши во март, приходите на Ryanair пораснале за 11 проценти, на 15,54 милијарди евра, додека нето-добивката по оданочување, без еднократни трошоци, скокнала за 40 проценти, на 2,26 милијарди евра. Компанијата превезла 208,4 милиони патници, што е раст од 4 проценти во однос на претходната година, и покрај доцнењата во испораката на 29 авиони Boeing 8200.

Билетите во штотуку завршената деловна година биле за околу 10 проценти поскапи од претходната фискална година. За периодот од април до јуни, Ryanair очекува просечните цени да бидат околу 5 проценти пониски од лани, бидејќи Велигден оваа година паднал во март. За летниот квартал, пак, компанијата очекува цените да останат „повеќе или помалку“ на нивото од минатата година.

Главниот финансиски директор на Ryanair, Нил Сорахан, изјави дека компанијата е сè посигурна дека нема да има проблеми со снабдувањето со гориво ниту по летото. Според него, рафинериите ја зголемиле преработката и обезбедуваат алтернативни извори на набавка, во услови на неизвесност околу Персискиот Залив.

Извршниот директор Мајкл О’Лири изјави дека добавувачите ја информирале компанијата дека до средината на јули не очекуваат нарушувања во снабдувањето со гориво. Сепак, Ryanair предупредува дека неизвесноста околу цените на горивото, даноците и трошоците и понатаму може да влијае врз авиоиндустријата, особено ако патниците продолжат да ги одложуваат резервациите.