Украинските одбранбени сили извршија напади со беспилотни летала врз две големи нафтени рафинерии на територијата на Русија. Украинскиот претседател Володимир Зеленски потврди дека цел на нападите биле рафинеријата „Славнефт-Јанос“ во Јарославл и „Башнефт-Новоил“ во Башкортостан.

Густ чад на локацијата во Јарославл беше забележан и од локалното население, кое сподели повеќе видеоснимки на социјалните мрежи. Верификуваните материјали покажаа најмалку четири пожари во рамките на овој индустриски комплекс. Рафинеријата се наоѓа на околу 280 километри североисточно од Москва и речиси 700 километри од украинската граница.

Гувернерот на Јарославската област, Михаил Евраев, изјави дека сите беспилотни летала што го нападнале регионот биле уништени од противвоздушната одбрана. Тој додаде дека падот на нивните остатоци предизвикал пожар во три куќи, скршени прозорци на неколку станбени згради и оштетување на повеќе возила. Информациите за евентуални жртви и повредени сè уште се разјаснуваат.

Покрај копнените цели во внатрешноста на Русија, Зеленски во својата објава истакна дека украинските сили успешно погодиле и два воени патролни брода, како и пловни објекти кои и припаѓаат на таканаречената руска „флота во сенка“ во Црното Море.