Најмалку 13 луѓе загинаа, меѓу нив и 12-годишно дете, во ноќните руски напади врз Украина, во кои со ракети и дронови беа погодени Киев и уште неколку градови. Нападите оставија зад себе оштетени станбени згради, пожари и десетици повредени.
Во Киев, според достапните информации, загинале најмалку четири лица, а 45 луѓе се повредени. Градоначалникот Виталиј Кличко соопшти дека спасувачките екипи интервенирале на повеќе локации, додека украинските служби за итни случаи објавија фотографии од големи пожари и урнати делови од згради.
Еден од нападите погодил 18-катница, а во централни делови од градот биле оштетени и други станбени објекти. Спасувачите, според украинските власти, извлекле мајка и дете од оштетена зграда, додека остатоци од проектил погодиле и станбен блок во населбата Подил.
Тешко погодени беа и Одеса и Днипро. Во Одеса загинале седум лица, а 11 се повредени, по неколку бранови ракетни и дронски напади врз градот. Локалните власти соопштија дека се оштетени инфраструктурни објекти и станбени згради.
Во Днипро, регионалните власти јавија за две жртви и 27 повредени. Објавени се и фотографии од станбени згради во пламен, што дополнително ја покажува силината на нападот. Во Харков, пак, во дронски напад биле повредени две лица.
Овие напади се дел од нов бран масовни руски удари врз Украина. Според Reuters, во изминатите 24 часа биле лансирани стотици дронови и десетици ракети кон различни украински градови и инфраструктурни цели, иако украинската воздушна одбрана пресретнала голем дел од нив.
