Русија го забрани извозот на авионско гориво до крајот на ноември, со цел да обезбеди доволни резерви за домашниот пазар, соопшти руската влада.

Забраната ќе важи до 30 ноември и се однесува и на авионското гориво купено преку стокови берзи. Од мерката се исклучени пратките кои веќе биле во царинска постапка пред стапувањето во сила на забраната, како и испораките што се реализираат врз основа на меѓудржавни договори.

Иако Русија не е доминантен светски извозник на авионско гориво, оваа одлука доаѓа во чувствителен момент за глобалниот енергетски пазар. Аналитичарите предупредуваат дека ограничувањето на извозот на керозин и дизел може дополнително да ја намали понудата на нафтени деривати и да изврши притисок врз цените на авионското гориво.

Тоа би можело да значи и нов раст на трошоците за авиокомпаниите, кои веќе се соочуваат со поскапи енергенси, нестабилност на Блискиот Исток и нарушувања во глобалните синџири на снабдување.

Одлуката се толкува и како сигнал за проблеми во руската рафинериска индустрија, особено по серијата украински напади врз енергетската инфраструктура.

Русија направи сличен потег и во април, кога го забрани извозот на бензин за домашни производители до 31 јули, исто така со цел да го стабилизира снабдувањето на домашниот пазар.

Новата забрана сега дополнително ја зголемува неизвесноста на пазарите, особено во секторот на авионскиот транспорт, каде цената на горивото е еден од најголемите оперативни трошоци.