Најмалку четири лица загинале, а 78 биле повредени во руските напади низ Украина во изминатите 24 часа, покажуваат податоците на локалните власти. Утрово руските сили го нападнале и Киев, каде што дрон погодил станбена зграда, објави „Киев индипендент“.

Во раните утрински часови руски дрон удрил во станбена зграда во киевската населба Оболон. Киевската градска воена управа соопшти дека две лица биле повредени и дека избувнал пожар.

Жртви во Чернихив

Руските сили го нападнале и градот Чернихив. Според локалните власти, загинал еден маж, а најмалку 25 лица биле повредени.

Воздушната тревога во Чернихив била активирана околу 13:40 часот по локално време поради опасност од ракетен напад. Неколку минути подоцна, украинските воздухопловни сили предупредиле дека кон градот се движат дронови и крстосувачка ракета од типот „Бандерол“.

Градскиот совет на Чернихив соопшти дека цел на нападот биле две приватни компании, но не објави дополнителни детали.

Напади врз станбени населби во Донецката област

Обвинителството на Донецката област соопшти дека во рускиот напад врз станбена населба во Краматорск, град во близина на фронтот, загинало едно лице, а шестмина биле повредени. Меѓу повредените има и три деца. Во Словјанск, исто така град на фронтовската линија, во руските напади претходниот ден загинала 62-годишна жена, а четири лица биле повредени, објави градоначалникот Вадим Лјах.

Во Дњепропетровската област, едно лице загинало, а осум биле повредени во напад врз градот Дњепар. Регионалниот гувернер Олександр Ханжа соопшти дека уште три лица биле повредени во општината Пидхородненска.

Во руски напад со дронови врз градот Житомир на 23 октомври биле повредени девет лица, меѓу кои и две деца, соопшти украинската полиција.

Напади во повеќе украински региони

Гувернерот на Харковската област, Олех Синехубов, изјави дека руските сили повредиле седум лица, меѓу кои 12-годишно девојче и 13-годишно момче. Во нападите биле оштетени или уништени станбени објекти, компании и бензински пумпи. Во Херсонската област руските сили гаѓале станбени подрачја, при што биле повредени шест лица, соопшти регионалната воена управа.

Уште три лица биле повредени во руските напади во Одеската област. Гувернерот Олех Кипер изјави дека Русија погодила рекреативен објект, административна зграда и складиште.

Во Сумската област Русија извршила 40 напади врз 25 населени места. Во неколку општини биле повредени пет лица, а регионалната воена управа соопшти дека воздушната тревога вкупно траела повеќе од 18 часа.

Украина соборила 101 руски дрон

Украинските воздухопловни сили соопштија дека руските сили во текот на ноќта лансирале 126 дронови, од кои 61 биле со млазен погон. Украинската противвоздушна одбрана успеала да неутрализира 101 дрон, меѓу кои и 50 со млазен погон.

Русија годинава го зголемила производството на дронови со млазен погон, кои е значително потешко да се соборат од постарите модели со пропелери. Од друга страна, Украина во изминатиот месец ја подобрила стапката на пресретнување на ваквите летала.