Бугарија влегува во завршна фаза од формирањето нова редовна влада, откако претседателката Илијана Јотова најави дека денеска ќе го врачи мандатот на „Прогресивна Бугарија“, партијата на поранешниот претседател Румен Радев. Со тоа започнува уставната постапка за состав на кабинет во рамките на 52. Народно собрание.
Мандатот, според бугарскиот Устав, се доделува на најголемата парламентарна сила, а тоа е токму „Прогресивна Бугарија“, која победи на предвремените парламентарни избори во април. Според Ројтерс, партијата освои 44,6 проценти од гласовите, што ѝ овозможува да формира влада без неопходна коалициска поддршка.
Се очекува Радев да биде предложен за премиер, со што поранешниот шеф на државата практично се враќа во центарот на бугарската политика, овојпат како носител на извршната власт. Неговата победа доаѓа по долг период на политичка нестабилност во Бугарија, обележан со чести избори, слаби влади и силен притисок од јавноста за борба против корупцијата.
Јотова претходно одржа консултации со политичките сили застапени во парламентот, по што оцени дека постои согласност за неколку итни приоритети. Меѓу нив се усвојување на државниот буџет за 2026 година, забрзување на судските реформи и носење закони поврзани со Планот за закрепнување и отпорност, од кои зависи и пристапот до европско финансирање.
Новата влада ќе треба брзо да покаже дали изборната победа на Радев навистина може да донесе стабилност во земја која со години се соочува со институционални блокади и политички пресврти. Иако неговата партија најавува борба против корупцијата и реформи, неговите позиции за дел од европските прашања и односите со Русија веќе предизвикуваат внимателност во Брисел и кај сојузниците во НАТО.
