Ааминистрацијата на американскиот претседател Доналд Трамп започна нова програма за штедење и инвестирање за деца, преку која најмладите Американци ќе добијат можност да влезат на финансиските пазари уште од раѓање.
Програмата наречена „Trump Accounts“ предвидува секое дете во САД под 18 години да може да има посебна инвестициска сметка, а бебињата родени во периодот од 2025 до 2028 година автоматски ќе добијат почетен државен влог од 1.000 долари. Иницијативата беше симболично промовирана со ѕвонење на почетокот на тргувањето на Волстрит, кое овојпат се одржа во Овалната соба во Белата куќа.
Како функционира програмата?
Сметките се достапни за сите деца под 18 години кои имаат важечки број за социјално осигурување. Родителите ќе можат да ги отворат преку мобилна апликација, а дополнително средства ќе можат да уплаќаат членови на семејството, пријатели и работодавачи. Годишниот лимит за дополнителни уплати е 5.000 долари по дете.
Парите мора да бидат вложени во нискобуџетен индексен фонд наменет за долгорочен раст. Средствата ќе бидат достапни кога детето ќе наполни 18 години, а можат да се користат за цели како високо образование, купување прв дом или други дозволени трошоци.
Колку може да порасне вложувањето?
Според проценките поврзани со програмата, почетниот влог од 1.000 долари би можел да достигне околу 6.000 долари до 18-тата година, доколку се оствари просечен принос сличен на историските резултати на индексот S&P 500. Со дополнителни годишни уплати од 250 долари, сметката би можела да достигне околу 19.000 долари, додека максималните уплати од 5.000 долари годишно би можеле теоретски да создадат капитал од околу 271.000 долари.
Критики: ќе им користи ли на сите?
Иако Белата куќа ја претставува програмата како начин милиони деца да добијат прв контакт со инвестирањето, дел од економистите предупредуваат дека најголема корист може да имаат семејствата кои веќе имаат финансиско знаење и можност за дополнителни уплати. Критичарите сметаат дека системот е сложен и дека семејствата со пониски приходи можеби нема да можат редовно да вложуваат дополнителни средства.
Експертите предупредуваат и на правилата за повлекување на парите, бидејќи предвремено користење на средствата може да биде проследено со дополнителни даночни обврски и казни.
Политички потег пред изборите
Програмата доаѓа во период кога високите трошоци за живот се едно од главните политички прашања во САД пред конгресните избори. Поддржувачите на иницијативата велат дека таа може да помогне во создавање култура на долгорочно штедење и сопственост над финансиски средства кај младите генерации.
Критичарите, пак, сметаат дека без пошироки економски мерки, само инвестициските сметки нема да ги решат проблемите со сиромаштијата и финансиската несигурност.
