Во рамки на судскиот процес за трагичниот пожар во дискотеката „Пулс“, обвинителството на последното рочиште започна со изведување материјални докази, при што беа презентирани детални информации за повредите на сите оштетени лица.
Обвинителката Наташа Сарамандова, повикувајќи се на наодите од медицинските установи каде биле лекувани повредените, ги изложи повредите, почнувајќи од најтешките кон полесните. Таа посочи дека кај голем дел од повредените се констатирани тешки телесни повреди, вклучително и изгореници на главата, телото, рацете и нозете, како и внатрешни повреди, нагмечувања на градниот кош, скршеници и оштетувања на дишните патишта.
Кај речиси сите тешко повредени биле утврдени површински и длабоки изгореници, а кај дел од нив тие зафаќале и повеќе од 20 проценти од телото. Дел од повредените имале скршеници на екстремитетите, но и на торзото, главата, вратот и рамото. Некои пациенти биле во состојба што барала кислородна поддршка, додека кај други имало изгореници од втор степен на лицето и сериозни нарушувања на функцијата на дишните органи. Во одредени случаи, како последица на повредите, евидентирана е и целосна дисфункција на одделни екстремитети.
Обвинителството посебно се осврна на повредите кај малолетниците. Кај децата, меѓу другото, се констатирани изгореници на кожата, скршеници, повреди на дишните патишта и нарушување на видот – делумно или целосно, на едното или на двете очи.
Според изнесените податоци, вкупно 137 полнолетни лица се здобиле со тешки телесни повреди, додека кај децата тој број изнесува 20. Дополнително, лесни телесни повреди се констатирани кај 65 лица, меѓу кои има и три деца. И кај овие случаи се евидентирани изгореници, крвни подливи, нагмечувања и оштетувања на коските.
Паралелно со читањето на доказите, во судницата биле прикажувани и визуелни материјали на екраните, што дополнително ја илустрирало сериозноста на повредите.
Во однос на причините за смрт, обдукциските наоди од Институтот за судска медицина покажуваат дека најголем дел од загинатите починале од насилна смрт како последица на труење со јаглерод моноксид. Кај четири лица, смртта настапила поради притисок врз градниот кош, додека кај тројца причината била недостаток на воздух и кислород.
Кај дел од жртвите кои починале подоцна, за време на лекувањето, обдукцијата утврдила акутна слабост на белите дробови поради интоксикација од јаглерод моноксид, додека кај едно лице причината била тешки изгореници од трет степен.
Обвинителството достави и дополнителен писмен одговор од Судска медицина, кој се однесува на прашања за смртоносни концентрации на јаглерод моноксид во крвта, брзината на настанување на смрт при задушување, како и разликите меѓу задушување и труење со овој гас. Дополнително, се разгледува и прашањето дали дел од жртвите би можеле да бидат спасени со навремена кислородна терапија.
Во текот на рочиштето, обвинителството предложи и ангажирање на вешто лице кое ќе одговори на дополнителните прашања што произлегуваат од обдукциските наоди.
Пред почетокот на судењето, одбраната на првообвинетиот Дејан Јованов-Деко побара замена на мерката притвор со куќен притвор, што предизвика силна реакција кај родителите на загинатите. Обвинителството даде негативно мислење за ваквото барање, посочувајќи дека ќе се произнесе дополнително поради нова медицинска документација доставена од одбраната.
Дополнителен револт кај родителите предизвикаа и наводите на дел од одбраната дека кај некои од жртвите имало присуство на алкохол, дрога или други психотропни супстанци. Претставници на семејствата нагласија дека причините за смрт се поврзани со вдишување чад и токсични гасови, а не со консумација на супстанци, и побараа ваквите тврдења да бидат поткрепени со докази или повлечени.
Следното рочиште е закажано за 4 мај, кога се очекува да сведочи еден од претходно отсутните сведоци, како и да биде присутно вешто лице од Судска медицина.
