Петтото издание на манифестацијата „ПроШарај“ ќе се одржи викендов, на 19 и 20 септември, на Попова Шапка. Настанот нуди отворена и бесплатна програма во дворот на комплексот „Конак“, насочена кон сите генерации – од искусни планинари до семејства со деца кои сакаат да ја доживеат планината без притисок од тешки патеки.

Организаторите најавуваат дводневни содржини наменети за рекреативци од различна возраст. Во дворот на „Конак“ ќе се одвиваат кратки планинарски тури, часови по пилатес на отворено, возење електрични велосипеди и креативни работилници.

Влезот е слободен за сите посетители. Идејата е да се отстранат бариерите за луѓето кои вообичаено не се гледаат како планинари, преку едноставни и достапни форми на движење.

Покрај спортските активности, локацијата ќе функционира и како планински базар. Посетителите ќе имаат пристап до музика, квизови, фотографски содржини и разговори со луѓе поврзани со развојот на шарпланинскиот регион.

Фокусот е ставен на заедничко користење на планинскиот простор, со порака за грижа и почитување на природата на Шара.