Во наредните денови Македонија ќе биде под влијание на променливо пролетно време, со сончеви периоди, повремен ветер и локални врнежи од краткотраен дожд. Денес и утре(17 и 18 април 2026) времето ќе биде променливо облачно со сончеви интервали, а повремено ќе дува засилен северен ветер. Најизразен ќе биде во Повардарието, каде локално може да достигне брзина до околу 60 км/час. Во делови од земјата се очекуваат и услови за краткотраен дожд проследен со ретки грмежи.
Во Скопје и околината исто така ќе преовладува променливо облачно време со сончеви периоди и повремено засилен северен ветер, со можност за краток локален дожд. Во недела (19 април) се очекува стабилизирање на временските услови, со претежно сончево и суво време и мала до умерена локална облачност. Северниот ветер ќе ослабне.
Температурите ќе се движат во умерени пролетни рамки. Утринските вредности ќе се спуштаат од 8 до 13 степени, а во недела од 3 до 10 степени. Во Скопје утринските температури ќе се движат околу 12 степени, а во недела околу 6 степени. Максималните дневни температури ќе достигнуваат од 19 до 25 степени, додека во Скопје од 21 до 24 степени. Во недела ќе биде малку посвежо, со дневни температури од 17 до 23 степени.
До крајот на денешниот ден ќе има зголемена концентрација на Сахарска прашина и песок во атмосферата, поради што воздухот ќе биде заматен и помалку квалитетен. Од сабота се очекува постепено повлекување на прашината кон југ и значително подобрување на квалитетот на воздухот.
