Со силниот раст на туризмот низ Европа, сè почесто се јавуваат тензии меѓу локалното население и туристите, главно поради зголемување на трошоците за живот и недостиг на достапно домување. Според ново истражување на дигиталната платформа JB.com, најсилен отпор кон масовниот туризам се забележува во Шпанија, Италија и Франција.

Истражувањето ги анализирало интензитетот на протести, медиумското внимание, туристичките такси и односот меѓу бројот на туристи и локалното население во 30 земји

Протести во европските туристички центри

Во Барселона и регионот Каталонија, како и на Балеарските и Канарските Острови, се одржале протести против прекумерен туризам. Локалните жители изразуваат незадоволство дека туризмот ги зголемува цените на становите и го отежнува животот во градовите. Во Италија, протести биле регистрирани во Венеција, Рим, Фиренца, Неапол и Милано. Дел од активистите презеле акции против краткорочните изнајмувања, обвинувајќи ги за недостиг на станови за локалните жители.

Во Франција, слични протести се одржале во Марсеј, Ница и Париз, како и против зголеменото присуство на крузер-бродови. Истражувањето наведува дека Кипар и Албанија се меѓу најприфатливите дестинации во Европа, со минимални протести и помал регулаторен притисок врз туристите.

Причини за растечкиот отпор

Главните причини за незадоволството се поврзани со недостиг на станови, раст на кириите и зголемен притисок врз инфраструктурата во популарните туристички градови. Некои градови веќе воведуваат ограничувања. Венеција повторно воведува туристички такси за еднодневни посетители во одредени периоди, како дел од мерките за заштита на историскиот центар.

Европските институции сè повеќе нагласуваат дека е потребен баланс меѓу економските придобивки од туризмот и квалитетот на живот на локалното население.