Италијанската модна куќа Прада влегува во светот на вселенската технологија преку соработка со компанијата Axiom Space за развој на нова генерација вселенски одела наменети за идните мисии на Месечината.

Астронаутите кои се очекува да отпатуваат на Месечината во 2028 година ќе носат специјално дизајнирани одела со напреден систем за ладење и вентилација. Клучен дел од опремата е внатрешниот слој наречен „Liquid Cooling Ventilation Garment“, кој овозможува одржување на оптимална телесна температура за време на движењето по површината на Месечината.

Системот функционира со циркулација на ладна вода низ оделото, која ја апсорбира телесната топлина. Истовремено, посебен механизам обезбедува доток на кислород и отстранување на јаглерод диоксид, што им овозможува на астронаутите поголема безбедност и удобност за време на престојот надвор од леталото.

Прада и Axiom Space уште во 2024 година ги претставија првите концепти на вселенски одела развиени за потребите на НАСА. Новата опрема е создадена да издржи екстремни услови и да поддржи подолги мисии на Месечината.

Оваа соработка претставува значаен чекор за Прада, која наместо инспирација од вселената, директно учествува во развојот на технологии за идните вселенски истражувања. Слични проекти во последните години развиваат и спортските брендови Under Armour и Columbia Sportswear.