На територијата на државата денеска до 18:00 часот се регистрирани вкупно 14 пожари на отворен простор, од кои еден е активен во скопската општина Ѓорче Петров, соопшти Центарот за управување со кризи (ЦУК). Од останатите регистрирани жаришта, четири се ставени под контрола, а девет се целосно изгаснати.

Пожарот во Општина Ѓорче Петров, во месноста Стопански Двор, е единствениот кој се води како активен до доцните попладневни часови. Според информациите од ЦУК, таму гори сува трева и грмушки, а екипите се на терен за спречување на негово понатамошно ширење.

Четири пожари се локализирани и ставени под контрола од страна на противпожарните единици. Меѓу нив е поголемиот пожар во Општина Кавадарци, кој опфати нискостеблеста шума и ниска вегетација на потегот меѓу селата Раец, Ќесендре и Дреново. Под контрола е и пожарот кај месноста Острец во селото Мождивњак, Крива Паланка, каде гори шума, како и интервенциите кај ресторанот „Сирач“ во Тетово и запаленото ѓубре во селото Горна Лешница, Општина Желино.

Противпожарните екипи успеаја целосно да изгасат девет пожари на отворен простор. На подрачјето на Општина Чучер Сандево беа изгаснати три пожари во селата Глуво, Мирковци и Кучевишка Бара. Во Скопско Поле е интервенирано на запалено дрво покрај пругата во Општина Гази Баба, а во Општина Карпош е ликвидиран огнот кај улицата „Скупи“.

Останатите изгасени пожари се регистрирани кај Тумбе Кафе во Битола, на депонија кај месноста Теќе во Прилеп, во селото Лабуништа во Струга, како и на потегот меѓу селата Шемшово и Сиричино во Општина Теарце.