Франција се бори со пожар од невидени размери во близина на шумата Фонтенбло, околу 70 километри југоисточно од Париз, додека екстремниот топлотен бран продолжува да ја зафаќа земјата.
Пожарот, кој француските власти го опишаа како „жесток“ и „исклучително голем“, зафатил околу 800 хектари, а околу 1.000 жители и туристи биле евакуирани од делови на општината Ле Водуе.
Пламенот стигнал до првите куќи
Градоначалникот на Ле Водуе, Мишел Калми, изјави дека „ѕид од пламен“ брзо се движел кон селото и стигнал до рабовите на станбените населби.
Портпаролката на француската влада, Мод Брежон, оцени дека станува збор за исклучителна ситуација и дека пожар од вакви размери досега не бил забележан во северниот дел на Франција.
„Исклучителна ситуација бара исклучителни ресурси“, изјави Брежон.
Канадери првпат гаснат пожар во регионот на Париз
Француските власти испратија два канадери, авиони Dash, два противпожарни хеликоптери и еден извидувачки авион.
Канадерите за првпат интервенираа во поширокиот регион на Париз, земајќи вода од реката Сена.
Од Националната противпожарна служба соопштија дека овие авиони досега главно биле распоредувани во јужна Франција, каде пожарите се почести.
Затворени автопати и прекинат железнички сообраќај
Пожарот предизвика затворање на дел од главната автопатска врска меѓу северот и југот на Франција, а нарушен е и железничкиот сообраќај.
Патниците на железничката станица „Гар де Лион“ во Париз се соочија со доцнења и до шест часа.
Во моментот на избувнувањето на пожарот, 37 француски департмани беа под највисок, црвен степен на предупредување поради екстремните горештини.
Отворени околу 2.000 центри за разладување
Француската влада отвори околу 2.000 центри за разладување во рамки на националниот кризен план ORSEC.
Воедно, дел од прославите за Денот на Бастилја беа откажани за да се намали ризикот од нови пожари предизвикани од огномети и да се растоварат службите за итна интервенција.
Поради високите температури, привремено беа исклучени и три нуклеарни електрани за да се спречи испуштање прегреана вода во реките.
Организаторите на Тур де Франс, исто така, ја скратија една од етапите за 30 километри поради температурите што се приближуваа до 40 степени Целзиусови.
Француските власти најавија дека во наредните недели во гаснењето пожари ќе почне да се користи и воениот транспортен авион Airbus A400M, по завршувањето на обуката на пилотите.
