Пожар со фронт подолг од пет километри ноќеска навлезе од косовска страна кон скопското село Грачани, каде што екипите на противпожарната бригада и два авиони „ер трактор“ успеаја да го сопрат огнот пред куќите. Директорот на Центарот за управување со кризи, Стојанче Ангелов, информираше од теренот дека огнената линија над селото е пресечена, но предупреди дека состојбата на државно ниво останува напната со повеќе од 40 активни жаришта на отворено во изминатото деноноќие.
Огнот што се спушташе од границата со Косово се закануваше директно да ги зафати првите куќи во Грачани. На теренот интервенираа скопските противпожарни единици заедно со тимови од Дирекцијата за заштита и спасување (ДЗС).
Главниот удар го зададоа двата противпожарни авиони „ер трактор“ на ДЗС, кои со прецизни налепи врз тешко достапниот терен овозможија пешадиските сили целосно да ја пресечат огнената линија над самото населено место. Теренските екипи потврдија дека со оваа координација е спречено навлегување на огнената стихија во селото.
Додека ситуацијата кај Грачани се става под целосна контрола, најтешката битка со огрните јазици во моментов се води на потегот меѓу општините Струга и Кичево. Таму утринава дејствуваше армиски хеликоптер како воздушна поддршка на струшките пожарникари, со цел да се прекине фронтот пред да се загрозат околните планински села.
Паралелно со ова жариште, нови пожари се регистрирани и на територијата на општина Студеничани. Според надлежните, станува збор за две локации што биле потпалени во текот на ноќта или во раните утрински часови, но засега не претставуваат непосредна опасност за населените места.
Само во текот на вчерашниот ден во земјава беа евидентирани над 40 пожари на отворен простор. Сувата вегетација и ветерот го прават теренот исклучително запалив, па надлежните институции апелираат на максимална будност од страна на граѓаните бидејќи и најмала искра може да предизвика неконтролирана штета.
Метеоролозите најавуваат врнежи од дожд во вечерните часови и во текот на утрешниот ден, но сè додека не падне обилен дожд, ризикот од брзо ширење на пламените јазици останува на највисоко ниво.
